|
音频：http://music.56.com/player.html?mid=2666780&userid=ulubeg
Ya！ bugün bu döyiğı geğen xarısı xurısı ullısı kiççisı balas-bulas yiraxqı yaxını， Bugün bu Hiciriyyeniği yaxşi döyi günninde， Men selere Urux sözur işgi ağız yişağı. Dünyade pısser kimne ullı etgusa dese？ Hemme Ahun ulumayine ullıetgusa diri. Nañniği yolında dese? Hudaniği yolında， Sulihaniniği güninde， Amubandinı başlağuca de. Bir xağatnı çörıse， Dünya ahıretnı görğuca de. Mimbere çixı qurannı aşı， İslamu diñiniği yaruxnı Amubandeğı yitırı. Yirexnı kiççi qoyi， Hudağı yaxın otquci adammari de， Mo yolındı pısser Ahunlanı ullur etgi diri. Munden tünı gelci pısser kemnı ullı etgusa dese ? Ağıldiği xarıxurırnı ullı etgusa diri. Nañniği yolında dese ? Başiñe dasdarnı vurı， İlıññe asanı ciyanı， Ergeş micitdı yukurı， Namazniği ili ardını， Terbetdı axlam yetgucarı ， Balabulağe dağ düznı ilanqucarı ， Ağılniıi başiguşine etgucarı ， Su ağzındı qalğucarı ， Yel ağzındı tusqucaride， Mo yolındı pısser ağıldiıi xarı xurını ullur etgi diri. Mundın tünı gelci pısser kemnı ullı etgusadese， İşgi arañnı ullı etgusa diri， Nañniği yolında dese ? Kiş çixse arañdın çixxar diri， Dimur çixse kurıx otçaxdın çixxar diri， Sinixniği isaride， Mo yolında pısser arañnı ullur etgi diri. Munden tüne gelci oısser kemnı ullıetgusa dese ? Pısser cöngili kişge küçietgucinı ullur etgi diri. Nañniği yolında dese ? Ergeş molanı gecisı gündüzı uxlalmi， Putün poñındiği guşnı çixxarı， Ullı işnı kiççi etgucarı ， Kiççi işnı yoqqan etgucarı ， Callanqanı vulağucarı ， Dağalğanı bağlağucarı ， Sunqanı qadağucarı ， Yitılğine yamağucarı ， Yazılğanı yiqqucarı ， Düğlingine tişgucarı ， Böğlinginı yörğucarı ， Yixılğanı tixgucaride Mo yolınde pısser bu kişlanı ullur etgi diri. Mundın tünı gelci pısser kemnı ullı etgusadese ? İşgi socinı ullı etgusa diri， Nañniği yolında dese ? Asmanda bulat yoxmese rehamet yoxdır diri ， Zimında soci yoxmese urux yoxdır diri! İşgi başnı qoşqucarı ， İşgi yirexnı dañqucarı ， Bixi dağqa to tixgucarı ， Ax quşlıre qañur daxqucarı ， Ax atde mohir basqucarı ， Yañı micitde minar xuvarğucarı de， Mo yolınde pısser işgi socine ullur etgi diri. Bugün muña gelğen yiraxqı qonax， Temdılmı gelğen ağinı kumusan， Nüğu nüğu selerniği altun suritıñ gözıme issarı， Altun adlarıñnı men qoşalmığanı altun gonıñlırı bir çişmiği diğen sözım bu dır. Men delli kişniği edişarı， Men delli atniği öynaşarı ， Qarañqudın çixqan sözımmarı ， Söznı tutdallırı， Vaxnı tutdalmırı， Bugün men bu vaxqı iriğide xalğaş işgi ağız yörği diğen sözım bu dır. On segis miñ dürlüx mexeluqıda， Qedırcuğu nañdır dese ? Pısser Adam balasa diri. Nañniği yolında dese ? İciniği xusaxda doqos aynı ködırı， On ayniği yaruxnı görı yere engu， Ata-neniği sebebde dürlüx dürlüx namutnı tıñnı， Bergetniği yolınde qometnı tüle， Peyğemberniği adını base bañketnıği yolında， İslamuniği bağlaxnı vure. Altı yidığı yetgu micitde qole， Alim hakimunı örğite， Hudaniği bırlüğını danığın yolında， Pısser adam balası qedırcuğu idir ediguci sözım bu dır. On yidı on sekıse yetgu， Oğıl vose bele al qız vose ele ber， Pıser ata-neniği işgi yağnındağı ， Gerdennı endırğusı idırdiğen sözım bu dır. Gurğunçux vose oñanı vahar diri， Uruh tutse cüdnı añnaşar diri， Tüt yişağen: Doqos dağnı bas gelci diri， Bixi çihse lafsi dola diri， Hadı yişeğen: Özen özennı bas gelci diri ， Dar yerride kömır çöyci diri ， Mo yolında pısser seler bir bırıñnı añnaş ahgilı， Örede ahgin şindı gumeş dañnığanka dañnı gelci， Enşede qum şindı altun dañnığanka dañnı gelci. Dal horase ornı ornaşqıkeler diri， Urux tutse öyçi yaraşqıkeler diri， Mo yolında miniği agune si qoñı verci diğen sebeb bu dır. Pısser yilniği işinde yilnı dañnacı， Ayniği işinde aynı dañnacı， Gunniği işinde yaxşi günnı dañnacı， Yüz gün sağınqan bir gün polanı， Bugün ette gelse， Gün yağlaci ay yağlaci， Ha girmici ho girmici， Bugün etiği yaxşi günne seler urux qaşiñler bilir diğen sözım bu dır. Miniği agu böyi varce yaş dağı değmici， Miniği agu uzan sacinı orha düğe， Pısser xarkişler basma bürıka basgelse ， Sen öyçi xoykema durı baskema ciğlı ， Bixiçux zelı ulliçux itı， Men öyçine söğu otasını qoyi， Sen öyçi yerdı tixilı， Şiraniği dört ayağı çidemağu itı， Namut iççindı namutnı tıñnı， Calax iççindı calaxnı carı， Ucca iççindı ulişnı qoyğenden vomi， Dağı ağinı kumusan öy öye camnı ullı etginı， Men qaravaş adam yandıralmes， Miniği yanişimnı bıçux isı saña， Bire beş beşşe on onne yüz yüze miñ......... Saña yaxcüçux bir yandırğe diğen sözım bu dır. Munda seler dañcasñ bir birne ciyaşqusarı ， Bir birne damnaş qusarı， Kiş ötbarse adı qallar diri ， Tırna üşbarse unnı qalar diri， Kunsi kolese modannı koler diri， At kolese eñırnı koler diri， Piçax kolese qınnı koler diri， Bazar kolese yütnı koler diri， Kiş kolese uruxnı koler diri， Munde seler dañcasıñ bır bırnı koleş diğen sözım bu dır. Bugun seler unniği yiliğinı alı， Calahniği simusını carı， Yağniği durısını ahgilı， Şiraniği döt ayağı çitdemağu itı， Dürlüx dürlüx namutnı qıllı beliği ullıetse， Qulax sen öyçiniğari söyingusı men öyçiniğari. Goconiği dört ayağı çitdemağu itı， Zoñanı cerğili qoyse， Bu zoña miniği agu gemdur sacahnı daña， Qolıñniği damurnı çusqunçux， Bir yiğni bir yiğni şirğen oltaññari， Kücir yiğni gözıden yisannı ötırı， Gözıñniği yağını döxgunçux， Bir yiğni bir yiğni çöyğen cicexxa dese， Qulah men öyçiniğari söyigusı sen öyçiniğari. Miniği agune bu qoğı veğen sebebu nañdır dese? Orha üşşerse bixi daş qayarı， Ah quşniği qanatı horağu yera diri， Daqqe üşşerse hoy dağğari， Rıdah vur odanalça dünyanı ötırğu yerra diri， Düzze üşşerse düz könnarı， Daqqa üşşerse dağ bixarıi， Mal tut cöngi exgu yera diri， Tüne üşşerse göx mörennari， Qoş dodah baluh öynağu yera diri， Sal vur altunkası dünyanı ötırğu yara diri， Daşi qode ax at bağlağu yerarı， Göx umus dezex cağlağu yerarı， Ahun alim çiqqan yeraride， Miniği agune verse viği dici. Miniği agu bu öyde: Daşka çişgi suka siñgi， Yağka puhraği sütka qaynağı ， Ax arfaniği qormaşka açilği ， Ax qoyniği yoñıka horaği， Buğuniği moñaska zomnaği， Ardı bağdiği bala yimuşka-- Tünı özex vurği，Orha budah ciyaği! Mingu atde çixqi， Durğu dalle çixqi， Giğu donne çiqi， Sıhqu umusuğı çixqi， Yaş yetgu oğılqız görği， Mal dolğu düz vaşe vurği， Gumaşniği korcalığınde otqi， Altunniği ağırlığıne çişgi， Bir oci yağ zitıññe yetgi， Bir oci un sanduqqe yetgi， Giğucine zeliği vağucine uzzatqi， Ülisı dirise man bir söyingi. Qudubaonino sen munde diñnibırmo? Miniği agu kulçe zimın yox öyçidın siqoñı gilı， İlıñdiği kurıxsapnı alğene-- Bilıñdiği suçahnı zeleğene volıryede， Görğinı azzarı， Bilmeğinı köpparı， Görmeğinı sen bir görğesguse， Bilmeğinı sen bir bildırğuse， Aşağını sen bir damnağuse， Bixisını sen bir endırğuse， Qormaş yidır uğğu çiñnatqur dese si ociñde varı? Et yidır quş çiñnatqur dese ham si ociñde var! Bugün men munda saña ağırçux işgi ağız kolebaği diğen sözım budır: Men delli kişniği yişaşarı， Men delli atniği öynaşarı， Qarañqudın çiqqan süzmmarı， Kişniği otişari! suniği ahişarı， Daşniği vuraşari! uhniği atişarı， Başi gelse ayağı gimiri， Ayağı gelse bili gimiri， Munda miniği sözım bırçux ornaşmese， Pısser Hudaniği qedır selamula asan pahulaşşal. Esslamu alykum verehmetullahi ! G.H.AZJF 2000年版 |
|
